-※ สูตรสำเร็จอึดใจเดียว ๒ (๖/๖) ※-
“…**ตอนปฏิบัติให้สูตรสำเร็จเกิดขึ้นแท้
อันนั้นต้องใช้เวลา-ต้องใช้เวลา**
คืออย่างผมว่านี้แหละ-อย่างหลวงพ่อว่านี่แหละ ผมคำนวณได้
เอ้า! พระพุทธเจ้าบอกไว้(ว่า) ‘ผู้ที่เจริญสติปัฏฐาน ๔
ให้ติดต่อกันเหมือนลูกโซ่อย่างนาน ๗ ปี อย่างกลาง ๗ เดือน
อย่างเร็วที่สุดนับตั้งแต่ ๑ วัน ถึง ๗ วัน มีอานิสงส์ ๒ ประการ
เพิ่นว่า ๑.เป็นพระอรหันต์ในปัจจุบันชาตินี้
ถ้าหากบ่ได้เป็นพระอรหันต์ในปัจจุบันชาตินี้
ต้องเป็นพระอนาคามีแน่นอนที่สุด’
อันนั้นไม่มีผู้แนะนำเด๊
เฮ็ดด้วยศรัทธาแท้ ๆ เด๊ เชื่อมั่นค้นคว้าหา
สูตรสำเร็จ(ที่)ผมว่านี้ มันมีผู้สอน
มีผู้สอนจังหวะ มีผู้สอนเทคนิคกลไก-มีคนเว้าให้ฟัง
**‘เอ้า-ผมรับรองว่า ๓ ปี ให้มันติดต่อกันจริง ๆ’
ฝึกหัดตัวของเฮาจริง ๆ มันจินิ่มนวลลงไปโลด
ถึงบ่ถึงที่สุดแท้-ก็จิรู้จัก เพราะผมว่าเด๊-ความจริงมันเป็นจังซี่
‘ตนตัวเฮาจิจืดไปหมด
พร้ามีดฟันเฮา มันสิเลือดจิกลับคืนสู่สภาพมันหมด
มันสิบ่ออกมาทางนอก’ นี่ให้ว่าจบหลักสูตรอันนี้
อันนี้แหละเพิ่นว่า ‘คนเกิดมาร้อยวันพันปี
หากบ่ฮู้จักสภาพหรือภาวะอาการเกิดดับอันนี้
ชีวิตของคนนั้นก็เป็นหมัน-เป็นโฆะ
บวชมาร้อยพรรษาก็ตาม ถ้าหากบ่ฮู้จักอันนี้
อานิสงส์การบวชของผู้นั้นก็เป็นโมฆะ บ่แม่นอานิสงส์อันนี้
บัดนี้คนเกิดมามื้อเดียวหนึ่ง
รู้-เห็นอาการเกิดดับอันนี้ มีค่า-มีราคามาก**
คนเกิดมามื้อเดียว มันจิฟังเป็นติ ?
มันก็กินข้าวบ่เป็น-นั่งก็บ่เป็น ฮ้องตะแงก ๆ อยู่จั่งซี่
อันพวกเฮานี้แหละ ฟังญาพ่อว่านี่แหละ
ฟังเทือเดียว-เข้าใจโลด เปลี่ยนแปลงได้
มีอานิสงส์มาก เพิ่นว่าจังซั่น
บัดนี้**บวชมาแล้ว-ก็มาฟัง แล้วรู้จักสภาพภาวะอาการเกิดดับ
อันนี้แหละมีอานิสงส์มาก** เพิ่นว่า
จึงว่า**‘ตั้งใจฟัง-ตั้งใจทำ อย่าให้มันถอยหลัง’**
อย่ามีการพูด-การคุยกันมาก แม่ออกก็คือกัน-พ่อออกก็คือกัน
พระเฮาก็คือกันทุกองค์ ถ้าหากเฮาเฮ็ดจังซี่แล้ว
ทับมิ่งขวัญ(ของ)เฮาจิค่อยก้าวไป-ก้าวไป เป็นจังซั่น
และก็ใช้ทุกสิ่ง-ทุกอย่าง พยายามช่วยกัน
แก้ไขดัดแปลงสิ่งที่บ่ดี ให้มันดีขึ้น
ครั้นมันดีแล้ว หมู่ท่านดีเอง
ผมบ่ได้ดีเด๊-ดีอย่างใดนี่ ดีแต่ผมว่าซือ ๆ
หมู่ท่านเป็นคนดีเอง
หมู่ท่านเองเป็นคนประกาศต่อไป
พระพุทธเจ้าตายแล้ว ก็มีสาวกประกาศมา
บัดนี้ผมตายแล้ว-ก็ลองเบิ่งดู ว่าจังซี่
**ลองเบิ่งดู ผมว่าคนจิมีปัญญาขึ้นมา**
*คนสร้างโบสถ์-สร้างสิม หมดเงินเป็นล้านนี่
ทำให้เป็นพระอริยบุคคลบ่ได้*
ปีกลายนี้-เปิดอบรมนี่ มีคนไปเล่าให้ผมฟัง(ว่า)
รู้จัก(การ)บ่ไหว้ผี-บ่ไหว้เทวดา สูตรต้น ๆ
บ่เชื่อฤกษ์งามยามดีนี่ ผู้นั้นได้สูตรต้น ๆ
สำเร็จขึ้นมาจัก ๒๐ กว่าราย บัดนี้กลางพรรษา-พรรษานี้
พรรษาที่แล้วนี่ก็มะเลาะเตาะแตะ มัน-ผมก็บ่ได้คุมมาก
เพราะว่าการปลูกสร้างเฮามันมาก
ปีนี้การปลูกสร้างมันก็น้อยไป
พรรษานี้ต้องคุมกันจริง ๆ-จัง ๆ ระยะ ๒ เดือนกว่านี้
**ต้องพยายามฝึกหัดดัดนิสัยตัวเองให้มันก้าวหน้าทุกคน**
**การปฏิบัตินั้น-อย่าไปเพ่งมัน เพียงทำให้มันสบาย ๆ
มองไปพู้น-มองมาพี้ ให้มันคิด-อย่าไปห้ามความคิด
มันยิ่งคิด-เรายิ่งรู้ มันยิ่งบ่คิด-มันก็ยิ่งบ่รู้** คือนักมวยนี่
เฮาเรียนมวยเก่ง แต่บ่เคยไปชกในสนามจักเทื่อ
เฮาจิรู้จักว่าเฮาเป็นแชมป์เปี้ยนได้บ่ ?
ผู้คน ผู้ที่ขเจ้าบ่เคยไปเข้าโรงกลึง-บ่เคยไปเข้าโรงเรียน
ขเจ้าเป็นแอ๊ดรถ(เด็กรถ) ครั้นรถ-นอตตัวใดเสีย
‘เอ้า! มึงไปแปง(ซ่อม)’ แอ๊ดรถเอามือเข้าไปหมุน-จำได้เลย
ผู้ไปเรียนเป็นช่างกลออกมา บางคนขับรถยนต์บ่เป็นซ้ำ-ก็มี
บ่ฮู้จักนอตตัว-นั้นตัวนี้ ก็มีซ้ำ
แอ๊ดรถนี่ มันเฮ็ดทุกมื้อ-มันจับทุกมื้อ…มันก็เลยรู้จัก
ขับรถยนต์เป็น รู้จักจับนอตตัวนั้น-ตัวนี้ได้
นี่…มันเป็นอย่างนั้น บัดนี้นักมวยคือกัน
เรียนแล้วบ่เคยขึ้นเวทีบัดนี้ บ่ได้เป็นนักมวยหรอก
**ขึ้นเวทีบ่อย ๆ-ชกบ่อย ๆ ฮู้จักเจ็บบ่อนฮั้น(ตรงนั้น)
เขาชกมาจังซั่น-รู้จักรับบ่อนนี้ แก้ไข
ผลที่สุด คนเคยชก-ก็เลยชนะทุกครั้ง
ก็ได้เป็นแชมป์เปี้ยนซั่นวะ** จิมีเรื่องจังใด๋
การปฏิบัติธรรมะของเฮาก็เช่นเดียวกัน ครั้นถ้าขึ้น ๆ-ลง ๆ
แพ้บ้าง-ชนะบ้าง โอ-บ่เป็นท่าแล้วอันนั้น
เรียกว่า**ตั้งเนื้อ-ตั้งตัว ตั้งต้นชีวิตใหม่-กลับต้นชีวิตใหม่
มาศึกษาเล่าเรียนสูตรลัด ๆ สูตรย่อ ๆ
สำเร็จรูปขึ้นมาเอง เป็นจังซั่น
เขาเอิ้นสูตรสำเร็จ-อันนี่
สูตร ๆ นี้ มีแล้วในคนทุกคน-บ่ยกเว้น**
จะถือศาสนาพุทธ-ก็มีสูตรนี้ จะถือศาสนาคริสต์-ก็มีสูตรอันนี้
เป็นคนไทย เป็นคนจีน เป็นคนฝรั่งเศส คนอังกฤษ คนอเมริกา
ก็มีสูตร ๆ นี้เหมือนกัน แต่คำพูดนั้นอาจจะไม่เหมือนกัน
ที่ผมพูดนี่-ผมเป็นคนไทยเด๊ ผมก็พูดภาษาไทยซั่นวะ
แต่ว่าผมพูดภาษาไทยบ่เป็น
พูดภาษาอันจังซี่(ภาษาจังหวัดเลย) พูดเป็นจังซี่
**นี่เป็นสูตรสำเร็จ
เมื่อสำเร็จแล้ว ก็ต้องรู้จัก-มีญาณเกิดขึ้น(ว่า)
‘ชาติสิ้นแล้ว-ภพสิ้นแล้ว พรหมจรรย์อยู่จบแล้ว-กิจอื่นไม่มี’
กิจการศึกษาหลักพระพุทธศาสนาจบ(ตรง)นี้**
นี่…เป็นจังซั่น
ที่นำมาเล่าให้ฟังมื้อนี้ ก็เห็นว่าสมควรแก่เวลาแล้ว
หลังจากการทำวัตรเย็น
ท้ายที่สุดนี้ ผมและพระสงฆ์และญาติโยมทุกคน
(ที่)มานั่งฟังธรรมะอยู่ ณ สถานที่นี้
**ผมขออ้างอิงเอาคุณของพระพุทธเจ้า
และพระธรรมคำสั่งสอนขององค์สมเด็จพระสัมมาสัมพุทธเจ้า
และคุณของพระอรหันตสาวก(ของ)พระสัมมาสัมพุทธเจ้า
มาเตือนจิตสะกิดใจของพวกเรา ให้พวกเราได้เจริญรอยตาม
อย่างที่พระพุทธเจ้าว่านั้นว่า ‘สัตว์ทั้งหลายคือเราตถาคต
สัตว์ทั้งหลายเหมือนเราตถาคต สัตว์ทั้งหลายเป็นตถาคต’
แต่บ่เป็นพระพุทธเจ้า เฮาเป็นสาวกพุทธะ
จึงว่า‘เฮารู้ตาม-เห็นตาม-เข้าใจตามพระพุทธเจ้า’
ข้อที่ ๔ นี่ พระพุทธเจ้าเพิ่นว่า
‘สัตว์ทั้งหลายเราผู้เป็นตถาคตไปถึงแล้วแห่งนั้น
แล้วจึงนำมาสอนพวกเธอทั้งหลาย
ให้พวกเธอทั้งหลายประพฤติปฏิบัติตามอย่างเราตถาคตนี้
ก็จะรู้-จะเห็น-จะเป็น-จะมีอย่างเราตถาคตนี้
เห็น-เป็น-มีเหมือนกันกับพระพุทธเจ้า**”
หลวงพ่อเทียน จิตฺตสุโภ