“…ดอกไม้เอามาบูชาพระพุทธรูปนี้
ธูปเอามาบูชาพระพุทธรูปนี้
เทียน-มื้อสวยก็ไต้(ตอนสายก็จุด) ญาพ่อเคยเห็นมาแล้ว
คนไปเอาบุญไต้เทียน ไต้เพื่อหยัง ?-บ่ฮู้จัก
อันนั้นแสดงว่าเฮ็ดตามเขาซื่อ ๆ
เจ้าของบ่ได้ใช้สติปัญญา เพราะปัญญาวิปัสสนาบ่เกิด
เทียน ๒ เล่ม จุดลงไป-หมายถึงตา ๒ ตานี้ มองให้เห็น
บ่จุดก็ได้-เทียน มื้อสวยจังซี่มันแจ้ง-ให้เข้าใจจังซั่น
ถ้าหากอยู่ที่มืด ก็ควรจุด
ไต้ไฟแล้ว เดินไป-มาสบาย…เพิ่นว่า
เทียน ๒ เล่ม…ก็หมายถึงตา๒ ตา-หู ๒ หูนี้ ฟังให้เป็น
เพิ่นว่าจังซั่น แต่เฮาบ่เข้าใจ
ก็เลยไปเฮ็ดตามพ่อ-ตามแม่ ตามปู่-ตามย่า
ปู่-ตา-ย่า-ยายเฮ็ดมาหลายชั่วคนแล้ว
*เมื่อใดเราสิมาปลดเปลื้อง เมื่อใดเฮาสิมาหงายของที่คว่ำนี้ขึ้นมา
เมื่อใดเฮาสิมามายเกลียวนี้ออกจากแหวนอันนี้ ?
นอตอันนี้ขันแน่นเข้าทุกมื้อ บ่มีผู้ใดมาเปิดจักเทือ-ของที่คว่ำหน้าไว้
แล้วเฮาสิเฮ็ดจังใด๋อยู่พอปานนี้*
ดังนั้น**การถือพุทธศาสนา ต้องพิจารณา
อย่าไปเชื่อคนที่บ่มีเหตุ-บ่มีผลว่า
แม่นสิยกพระไตรปิฎกมาก็ตาม-ชั่ง ญาพ่อบัดนี้
แต่ก่อนญาพ่อเชื่อ
พระพุทธเจ้าสอนแต่เรื่องให้เฮามีปัญญาแก้ทุกข์เท่านั้นเอง
ให้เฮามีปัญญาแก้ทุกข์ได้จริง ๆ
ถ้าหากเฮาบูชาดอกไม้ รับศีลอยู่ทุกเช้า-ทุกเย็นก็ตาม…ชั่ง
ถ้าหากเฮายังโง่-ยังทุกข์อยู่ บ่แม่นเด้-อันนั้นบ่แม่นแท้ ๆ เด้**
พระพุทธเจ้าตรัสกับพระวักกลิแล้วเด้
**‘ผู้ใดเห็นธรรม-ผู้นั้นเห็นเรา’ ว่าซั่น
‘ผู้ใดไม่เห็นธรรม-ผู้นั้นไม่เห็นเรา’ ว่าซั่น
‘จะจับชายจีวรอยู่-ก็ไม่เห็นเราเลย เพราะไม่เห็นธรรม’ ว่าซั่น
เพิ่นว่า‘ยังห่างไกลจากคำสอนของพระพุทธเจ้ามากที่สุดเด้
ถ้าหากยังแก้ทุกข์นี้บ่ได้ บ่มีปัญญารู้’**
ถ้าหากเฮาไม่เข้าวัดก็ตาม-ชั่ง บ่รักษาศีลก็ตาม
แต่**เฮาฮู้จักแก้ปัญหาตัวเองได้ เพิ่นว่า‘เข้าใกล้พระพุทธศาสนาเด้’
เพิ่นว่า‘เข้าใกล้พระพุทธเจ้าเด้’**
ดังนั้นเพิ่นถึงมีไว้ กฎหมายก็มีไว้-วินัยก็มีไว้
กันคนบ่มีธรรมะ กันคนโง่ ๆ เท่านั้นเอง
เทียน ๒ เล่ม หมายถึงตา ๒ ตา
เทียน ๒ เล่ม หมายถึงหู ๒ หู…นี่ฟังให้เป็น
ธูป ๓ ดอก หมายถึงกาย-วาจา-และใจนี้
ถ้ากายทำบ่ดี-คำปากนี้พูดบ่ดี-ใจคิดบ่ดี มันเหม็น…เพิ่นว่าจังซั่น
ถ้ากายนี้ทำดี บัดนี้คำปาก-คำเว้าพูดดี ๆ
ใจคิดแต่ดี…มันหอม-เพิ่นว่าจังวั่น
เอาธูปมาจุด ๓ เล่ม เนี่ยให้เฮาพิจารณาหาของจริง
ถ้าหากเฮาบ่พิจารณาหาของจริงแล้ว
ก็สิทำผิดไว้ให้ลูก-ทำผิดไว้ให้หลาน เป็นโรคเรื้อรังอยู่จังซี่แหละ
เพิ่นว่า ‘ทำดีไว้ให้ลูก-ทำถูกไว้ให้หลาน’
ลูกหลานเฮาจะเห็น-จะรู้-จะเอาไปปฏิบัติ ขเจ้าก็สิเข้าใจโลด
พ่อ-แม่ ปู่-ย่า ตา-ทวดว่าจังซั่น แต่บ่ใช่ว่าให้เลิกเด้
อันนั้นก็ได้-เฮ็ดไปนั่นแหละ เฮ็ดเพื่อคนบ่ฮู้จัก
ลองเบิ่ง แม้อย่างญาติโยมที่มามื้อนี้ก็ได้
ลูกหลานมาแล้วก็พาเขาจุดเทียน ‘หมายถึงตา ๒ ตานะหลานนะ
หมายถึงหู ๒ หูเด้อ-เทียน ๒ เล่มนี่’ บอกเขาจังซี่-เขาฮู้จักโลด
ธูป ๓ ดอกนี้จุดลงไปแล้ว หมายถึงทำดี-พูดดี-คิดดีนะ
บอกเขาจังซี่ เขาก็ฮู้จัก-จำได้…”
หลวงพ่อเทียน จิตฺตสุโภ